Check with seller
Aumenta ba lista
Konsultór Nasionál ba Dixiplina Matemátika

Data Publika: 13/09/2019
  • Fatin: Vila Verde, Dili Timor-Leste, Colmera, Dili, Timor-Leste

 Termu Referénsia    


Konsultór Nasionál ba Dixiplina Matemátika - Revizaun Kurrikulár


Ensinu Báziku (siklu datoluk)


Fulan-outubru, 2019 – fulan-dezembru, 2020


 


Ministériu Edukasaun, Juventude no Desportu Timor-Leste (MEJD) sei hala’o revizaun kurrikulár ba siklu datoluk Ensinu Báziku nian (klase 7-9). Nu’udar parte ida hosi esforsu atu fornese edukasaun ho kualidade aas tebes, Ministériu sei lidera prosesu revizaun ida-ne’e, ne’ebé sei hahú hodi foka ba avaliasaun kle’an ba kurríkulu atuál atubele fó sai rekomendasaun sira-ne’ebé bele aplika ba melloramentu ba kualidade Ensinu Báziku ba tempu naruk. Oras ne’e MEJD buka Konsultór/a Nasionál ida atu elabora kurríkulu matemátika ba Ensinu Báziku siklu datoluk nian ho kualidade másimu, inklui programa kurrikulár no rezultadu sira-ne’ebé hakerek ba nivel klase ida-idak. Konsultór ne’e sei serbisu besik ho Koordenadora sira projetu nian, Unidade Curríkulu Nacional (UCN), Direção Nacional do Ensino Básico (DNEB), Instituto Nacional Formação Docentes e Profissionais de Educação (INFORDEPE), ekipa tékniku dixiplinár sira, no Korpu Konsultativu ba projetu revizaun ida-ne’e. 


 


1.      Antesedente


 


Timor-Leste mak nasaun joven ida iha Ázia. Nasaun ne’e hetan ukun rasik-an iha tinan 2000, liutiha tinan 300 resin administrasaun koloniál Portugés no okupasaun Indonézia durante tinan 24. Sektór ida-ne’ebé xave ba dezenvolvimentu nasaun nian mak Edukasaun. Iha Timor-Leste, edukasaun mak direitu konstitusionál ida-ne’ebé hatuur iha artigu 59, ne’ebé dehan katak sidadaun sira hotu iha direitu ba edukasaun, no Estadu sei fornese edukasaun báziku ida-ne’ebé  universál, obrigatóriu no saugati ba ema hotu (Lei-Inan RDTL, 2002). Direitu konstitusionál ida-ne’e sertifika liután hosi Lei Baze Edukasaun, ne’ebé mós ezije Ensinu Báziku ida-ne’ebé obrigatóriu no saugati ba labarik Timoroan sira hotu (Lei 14/2008, 29 fulan-outubru).


 


Prosesu harii ka harii fali Sistema Edukasaun ida mak la fasil ida. Dezde ukun rasik-an, Timor-Leste kontinua ho objetivu atu hadi’a ninia sektór edukasaun liuhosi haluan asesu no kobertura iha territóriu tomak. Durante tinan hirak Ministériu Edukasaun fó importánsia aas ba hasa’e asesu no mós aumenta kualidade edukasaun nian, inklui rekrutamentu no formasaun ba manorin sira, harii infraestrutura eskolár, no fornese materiál ensinu-aprendizajen ba klase no nivel sira hotu. Maski esforsu sira-ne’e, no sira seluk, prodús rezultadu signifikante sira, progresu barak mak seidauk atinji.


 


Kurríkulu mak sistema edukasionál nia kotuk-ruin, nune’e sai fatin di’ak hodi hahú bainhira ko’alia kona-ba melloramentu ba kualidade edukasaun no dezempeñu estudante sira-nian. Oras ne’e Kurríkulu iha Timor-Leste estruturadu hanesan tuirmai ne’e:


1.      Pre-eskolár: kurríkulu foun hahú implementa iha tinan 2015. Kurríkulu ida-ne’e fó énfaze ba dezenvolvimentu liuhosi halimar, abilidade pre-literasia no pre-numerasia, no mós dezenvolvimentu sosio-afetivu labarik sira-nian, hodi ajuda sira espresa sira-nia sentimentu no hanoin iha maneira koerente no respeituozu.


2.      Nivel primáriu (Ensinu Báziku, siklu da-1 no da-2): Iha tinan-2015, kurríkulu foun hahú implementa fazeadamente ba klase 1-6. Klase 1 no 2 implementa iha tinan 2015 nia klaran; iha tinan 2016 klase 3 no 4 hahú implementasaun, no klase 5 no 6 tenke hahú iha 2017. Kurríkulu ida-ne’e koko moderniza kurríkulu uluk nian, hodi implementa enkuadramentu bazeia ba rezultadu sira, progresaun linguístiku ida-ne’ebé apropriadu kontestualmente no linguistikamente, no pedagojia sira-ne’ebé sentradu ba labarik. Kurríkulu ida-ne’e tane aas dezenvolvimentu kognitivu, sosio-afetivu no fíziku labarik sira-nian, iha kontestu ida-ne’ebé relevante kulturalmente no sustentavel lokalmente.


3.      Nivel pre-sekundáriu (Ensinu Báziku Siklu datoluk). Kurríkulu atuál, ne’ebé haree ba klase 7 to’o 9, mak halo tinan sanulu liubá. Kurríkulu ida-ne’e tenke atualiza atu asegura hanorin abilidade sékulu 21 nian, no mós atu asegura artikulasaun no Kurríkulu Baze Siklu Dahuluk no Daruak nian.


4.      Nivel sekundáriu (klase 10-12): Nivel eskolár ida-ne’e fahe ba Ensinu Sekundáriu Jerál no Ensinu Sekundáriu Tékniku Vokasionál. Kurríkulu ba área rua ne’e sei revee hafoin revizaun Kurríkulu Siklu Datoluk nian, atu asegura ligasaun di’ak entre nível ensinu sira-ne’e.  


 


 


2.         Justifikasaun


Objetivu hosi serbisu ida-ne’e mak atu apoia Ministériu Edukasaun, Juventude no Desportu atu asegura kurríkulu matemátika Ensinu Báziku siklu datoluk nian ho kualidade másimu. Kurríkulu ida-ne’e deve dezenvolve estudante sira-nia abilidade sékulu 21 nian, no mós asegura relevánsia ba estudante sira-nia meiu ambiente no domíniu ba kapasidade báziku sira-ne’ebé estudante sira sei presiza atu hala’o moris olístiku no produtivu. Kurríkulu Siklu Datoluk nian tenke garante katak estudante sira hotu sei remata Ensinu Báziku ho fundasaun báziku ho abilidade sira-ne’ebé presiza ba satisfasaun pesoál no susesu ekonómiku, inklui abilidade atu rezolve problema ho inovasaun no kriatividade iha kontestu oioin, no mós fleksibilidade atu adapta hodibele kompete iha ekonomia globál.


 


3.         Rezumen ba Knaar no Responsabilidade sira


Konsultór/a Nasionál Matemátika sei serbisu hamutuk ho Koordenadora projetu nian no membru sira seluk hosi ekipa atu revee no avalia kurríkulu atuál, no bazeia ba rezultadu hosi atividade ida-ne’e, hamutuk ho konsidera kultura no istória nasionál no nesesidade lokál sira, asegura katak prosesu dezenvolvimentu kurríkulu Dixiplina Matemátika ba siklu datoluk fornese abilidade matemátika ne’ebé relevante no kontestualizadu, no mós aliña ho padraun internasionál sira, inklui Objetivu Sustentavel Dezenvolvimentu nian, Edukasaun ba Ema Hotu, no inisiativa sira seluk ne’ebé haree ba edukasaun mundiál ho kualidade, no mós tenke relevante ba parte-interesadu sira hotu.  


4.         Knaar no Responsabilidade Espesífiku sira:


Responsibilidade sira inklui, maibé la limita ba:  


·         Revizaun no avaliasaun ba materiál matemátika iha kurríkulu atuál, programa kurrikulár sira no materiál ensinu-aprendizajen no suplementár;


·         Serbisu besik ho Korpu Konsultativu no grupu referénsia sira, inklui garante komunikasaun kabeer no aberta ho ema hotu ne’ebé envolve iha prosesu;


·         Bazeia ba rezultadu hosi diagnóstiku abilidade matemátika, matadalan sira-ne’ebé SESIM halo, no mos hodi serbisu hamutuk ho membru ekipa sira seluk no membru sira hosi Korpu Konsultativu, asegura kurríkulu siklu da-3 nian ne’ebé inkluzivu, efetivu no modernu, no mós ho komponente matemátika ne’ebé asegura katak estudante sir abele aplika matemátika iha sira-nia moris loroloron. Kurríkulu no planu programátiku sira-ne’e hotu tenke prátiku, dinámiku no ho kualidade pedagójiku aas;


·         Apoia prosesu diagnóstiku nesesidade nian ne’ebé efetivu, ho análise loloos ba rezultadu sira, no sira-nia uzu atu hatama ba revizaun kurrikulár;


·         Hodi serbisu hamutuk ho ekipa revizaun kurrikulár no Korpu Konsultativu, elaborasaun ba Kurríkulu Nasionál Baze Siklu Datoluk nian ba Matemátika, no ninia programa kurrikulár sira, ne’ebé asegura aprendizajen ba abilidade sékulu 21 nian iha maneira ida-ne’ebé apropriadu kontestualmente. Kurríkulu ida-ne’e tenke bazeia ba istória, kultura no maneira moris lokál, no iha tempu hanesan garante prátika di’akliu internasionál, no padraun aprendizajen sira-ne’ebé bazeia ba rezultadu sira, no bele atinje no apropriadu duni;


·         Apoiu ba formulasaun ba enkuadramentu materiál ensinu-aprendizajen sira-ne’ebé presiza atu apoia no asegura aprendizajen estudante sira-nian, no mós formasaun ba manorin sira-ne’ebé presiza ba implementasaun efisiente ba kurríkulu foun;  


·         Fasilita pilotajen ba kurríkulu foun matemátika nian iha sala-de-aula sira, hodi asegura ninia relevánsia no abilidade atu manorin sira bele uza, no mós atu garante katak ekipa tékniku sira inkorpora lisaun sira hosi pilotajen sira-ne’e ba revizaun kurríkulu nian, hodi ajuda finaliza prosesu; 


·         Apoia no elabora gia ba manorin sira, no mós materiál ensinu-aprendizajen sira seluk ba estudante sira iha área ida-ne’e ba klase 7-9;no


 


·         Responsabilidade relevante adisionál sira tuir presiza.


5.         Rezultadu sira-ne’ebé espera


 


·         Apoia Ekipa hodi hala’o avaliasaun ba kurríkulu matemátika da-3 nian;


·         Apoia análise ba diagnóstiku ne’ebé sukat estudante sira-nia dezempeñu matemátika nian;


·         Kurríkulu matemátika siklu da-3 nian ne’ebé asegura aprendizajen ba abilidade sékulu 21 nian iha maneira ida-ne’ebé apropriadu kontestualmente. Kurríkulu ida-ne’e tenke bazeia ba istória, kultura no maneira moris lokál, no iha tempu hanesan garante prátika di’akliu internasionál, no padraun aprendizajen sira-ne’ebé bazeia ba rezultadu sira, no bele atinje no apropriadu duni;


·         Pilotajen no diagnóstiku sira seluk no uzu ba ninia rezultadu iha dezeñu kurríkulu matemátika nian;


·         Planu programátiku no materiál ensinu-aprendizajen matemátika nian ne’ebé relevante no ho kualidade pedagójiku ne’ebé aas; no


·         Relatóriu progresu badak ida fulan-fulan.


 


 


6.         Supervizór


Konsultór/a Nasionál Matemátika sei superviziona hosi Koordenadora Projetu nian, no UCN MEJD nian, ho koordenasaun ho asesór tékniku sira hosi Unidade Apoio Conjunto (UAC).


 


Favór sobmete dokumentu sira iha leten to’o tuku 5:30pm OTL, loron 20 fulan-setembru, tinan 2019 ho atensaun ba ema tuirmai:


 


Ministériu Edukasaun, Juventude no Desportu, UCN no UAC


Attn: Antoninho da Silva Pinto


Attn:  Santina da Cruz


Vila Verde, Dili Timor-Leste


ToR Dettailus email: revisaunkurrikulum.mejdtl@gmail.com


 


 

Deadline

Data 2019-09-20

Edukasaun

Level Edukasaun Masteradu

Lingua

English Yes
Portuguesa Yes
Tetum Yes

Tinan Esperiensia

Tinan 3

Area Espesialidade

Communication Yes
Counseling Yes
Data Research Yes
Development Yes
HR (Human Resources) Yes
Teaching Yes
Ita nia votu konfiansa:
Vota
Rezultadu votante 0
Knua Juventude Fila Liman
0 votes
Share by email Share on Facebook Share on Twitter Share on Google+ Share on LinkedIn Pin on Pinterest

Fahe ba kolega

Komentariu iha nee

    Fó komentariu iha ne'e (spam no liafuan ne'ebé ladiak, ami sei hamos)